Ha laum kitab Sharhu Aqeedah Tahawiyyah, page 458, kiyasulat in hadith:

نقل عن ابن عمر رضي الله عنه أنه أوصى ان يقرأ على قبره وقت الدفن بفواتح سورة البقرة و خواتمها و نقل أيضا عن بعض المهاجرين قراءة سورة البقرة

Kiyanukkil in riwayat dain kan Ibnu Umar (ra) sin sabunnal tuud nagminmin siya sin bassahan in kubur niya ha waktu siya ampa kiyubur sin panagnaan iban kahinapusan sin Surah Baqarah. Iban kiyanukkil da isab dain ha kaibanan mga shabat Muhajirin in pagbassa sin Surah Baqarah.

Awun da isab hadith riwayat hi Imam Baihaqi (rah):

أن ابن عمر استحب ان يقرأ على القبر بعد الدفن أول سورة البقرة و خاتمتها

Sabunnal tuud kiyatagihan tuud hi Ibnu Umar (ra) in bassahun ha kubur puas na mayan magkubur in panagnaan iban kahinapusan sin Surah Baqarah.

Awun pa hadith riwayat hi Imam Daruqutni (rah):

من دخل القبور فقرأ قل هو الله أحد إحدى عشرة مرة ثم وهب ثوابها للأموات أعطي من الأجر بعدد الأموات

Hisiyu-hisiyu in simud pa kakubulan ampa siya miyassa sin Surah Qul Huwallahu Ahad (Surah Al Ikhlas) maka hangpuh-tagisa ampa niya piyagdihil in pahalah pa mga mayat (ha kakubulan yan), nah dihilan siya pahalah biyah sin taud sin mayat ha kakubulan yadtu.

Awun pa riwayat hi Imam Tabrani ha kitab niya Mu'jamul Awsat iban hi Ibnu Qayyim Al Jauziyyah ha laum kitab niya Ar Ruh:

كانت الأنصار إذا مات لهم الميت يختلفون إلى قبره يقرؤون القرءآن

In kiyaawnan sin mga sahabat Ansar nakauna yadtu, bang sila pagkamatayan mayat, nah magkadtu sila pa kakubulan magbassa sin Qur'an.

Pahati: Mga taymanghud ha agama, wayruun na kami nagbangkil bang saheeh ka in mga hadith yan atawa dha'eef, ha karnah in mga hadith yan ha laum lingkupan da sin fadhailul a'maal amu in piyagtayakkupan sin mga muhadditheen manjari pagpakayan sin mga hadeeth dha'eef. Iban jukup na in taud sin mga hadith yan ha supaya magtuku-tiyukuhi bang sawpama awun hadith dha'eef nakalamud dunhan. In matarrang, bukun in mga hadith yan mawdhu' (hinang-hinang).

Paglamuran niyu in kami ha mga duwa'a niyu pa unu-unu na karayawan. Wassalam.